Rusiye mahkemesi tarafından mahküm etilgen, on yıl devamında Rusiyede apis cezasını çekip, Gürcistanğa çıqmağa tırışqan Avromaydan faali Andriy Kolomıyetske Gürcistanda keçüv noqtasından keçmek içün kerekli ukrayin vesiqaları berildi.
Bu aqta "Suspilne Qırımğa" Ukrayina Tış işler nazirliginde bildirdiler. Vesiqalarnıñ alınğanını Andriy Kolomıyets özü de tasdıqladı.
"Gürcistan ve Moldovadaki Ukrayina elçihaneleri yaqın vaqıtta Ukrayina vatandaşı Andriy Kolomıyetsni qaytarmaq içün maniasız tranzit teşkil etmek içün faal çalışalar", — dep aytıla Ukrayina Tış işler nazirliginiñ haberinde.
Oraq ayınıñ 8-nde bildirilgenine köre, Avromaydan faali Andriy Kolomıyets Rusiye-Gürcistan sıñırındaki Yuqarı Lars nezaret noqtasında, Şimaliy Osetiyada tutula.
2025 senesi qara qış ayınıñ 15-nde Krasnodar koloniyasından çıqtı. Bundan soñra Kolomıyets tutuldı ve Rusiye İç işler nazirliginiñ Gülkeviç rayon bölüginiñ çetel vatandaşlarını vaqtınca tutuv merkezine ketirildi. Ertesi künü Rusiye mahkemesi onı çeçek ayınıñ 14-ne qadar çetel vatandaşlarını vaqtınca tutuv merkezine yerleştirmege qarar berdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
