Qırımlı siyasiy mabüs Nariman Celâl Ankarada Cumhurbaşkanlığı Külliyesinde Türkiye Cumhuriyeti prezidenti Recep Tayyip Erdoğanğa işanç mektübini berip, Ukrayinanıñ bu memlekette Fevqulâde ve Vekâletli Elçisi olaraq faaliyeti içün bütün vekâletlerini aldı.
Nariman Celâlnen 2021 senesi küzde Aqmescit SİZOsında tanıştıq. Tahqiqat tedbirleri ya da Qırım mahkemelerine etapnı beklegende tahqiqat altında olğan er kesni «içek» degen bir yerge llay ediler – izolâtor mağazında uzun kirli bir ayat. Anda, «içekten» evel, maña baqqan yüksek boylu közlükli tanış olmağan bir adamnı kördim. Qulaq asmayıp, mabüslernen laf etmege devam ettim (olarnıñ ikâyelerinen meraqlanğan edim, etaplardan qaytıp, er şeyni yazmağa tırışa edim).
Vaqıt keçkeninen tanış olmağan kişi yanıma kelip soradı: «Adıñız Vladmı?» ve ebet cevabımnı alıp, onıñ adı Nariman olğanını ayttı, ikâyemni bile ve 2021 senesi yazda Kyivdeki «Qırım platformasında» ömür arqadaşımnen laf etip, qoltutqanını bildirgen edi. O vaqıt menim içün daa yaqın bir insan yoq edi. Taze bir ava kirgen kibi oldım. Nariman özü, qorantası, uydurılğan davası aqqında ve tek özü içün degil, SİZOda olğan bütün siyasiy mabüsler içün nasıl küreşecegini ayttı. Bir ilham bere edi, men de bunı yapqanımnı tüşünem, ve artıq eki kişi edik!
SİZOda bizni farqlı qatlarğa yerleştirgenler, amma tavan altındaki kiçik pencereçiklerden qıçırıp laf etmege imkân bar edi. Bir-birimizge hayırlı sabalar ayta, Ukrayinadan haberlernen ve apishane haberlerinen paylaşa edik. Meraqlı, amma SİZOğa maña «Novaya gazeta» Rusiye muhalifet neşiri (muarriri – Nobel laureatı Dmitriy Muratov) kele edi. Onıñ saifelerinden men ve Nariman Ukrayinada ölgen ilk biñ Rusiye arbiyi ve olarnıñ «arbiy operatsiyası» planlarına köre ketmegeni aqqında haberdar oldıq.
Etaplardan birinde Nariman meni «qabaat ortaqlarınen» tanıştırdı, ağa-qardaş Aziz ve Asan Ahtemovlarnen. Gençler FSBden em bedeniy, em maneviy olaraq çoq çekse de, yahşı dayana ediler.
SİZO ayatında Narimannıñ yanına qırımtatar mabüsleri kelgenini ve er biri laf etmege, qoltutuv sözlerini aytmağa tırışqanını kördim. Avtozak penceresinden ise Narimannen birdemligini köstermek içün Aqmescit mahkemesi ögünde toplaşqan insanlarnı köre edim. O vaqıt bir fikir keldi aqlıma, Nariman – milletniñ aqiqiy liderlerinden biri, ve, belki, Ukrayinanıñ nevbetteki prezidentidir.
Ukrayina prezidentiniñ onı Türkiye elçisi olaraq tayin etkenine can-yürekten quvanam!
Kreml saibine yahşı bir şamar kibi körüne – «diversant» ve «terrorist» Nariman Celâlovnı Türkiye prezidenti Tayyip Erdoğan eñ yüksek seviyede qabul ete.
Vladıslav Yesıpenko, jurnalist, sabıq siyasiy mabüs
«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
