Kütleviy haber vastaları ve yerli akimiyet vekilleri bildire ki, oraq ayınıñ 11-nde onlarnen dron Rusiye arbiy-sanayı kompleksi ve Rusiye Federatsiyasınıñ çeşit regionlarında ve işğal etilgen Qırımdaki diger arbiy obyektlerge ücüm etti.
“Astra”nıñ malümatına köre, dronlar Tulanıñ Proletar rayonına ücüm etti, mında üç büyük mudafaa sanayısı zavodı yerleşe. “Astra”nıñ qayd etkenine köre, bütün üç müessisege quralay ve ilk yaz aylarında endi ücüm etilgen edi.
Tula vilâyetiniñ yolbaşçısı Dmitriy Milâyev bildirdi ki, uçucısız uçaqlarnıñ ücümi neticesinde bir insan elâk oldı, daa bir kişi yaralandı.
Oraq ayınıñ 11-ne keçken gecesi Rusiye Federatsiyasınıñ territoriyasında 148 ukrayin dronu urulıp tüşürildi, işğal etilgen Qırım üzerinde ise 7, dep bildire Rusiye Mudafaa nazirligi. Pilotsız uçaqlarnı Brânsk, Belgorod, Kursk, Tula, Orel, Lipetsk, Rostov, Kaluga ve Moskva vilâyetleri, em de Qırım üzerinde yoq ettiler. Qırımğa ücüm tafsilâtları aqqında Rusiye akimiyeti ve kütleviy haber vastaları haber etmey. Qırım telegram kanallarında patlavlar ya da ava mudafaasınıñ işi aqqında yazılmadı
Ukrayina tarafı bu haberlerni izaatlamadı.
2022 senesi arman ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı “Ukrayina uçucısızlarına” qarşı ateş ve “ava mudafaa sistemasınıñ işi” dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün “esas telüke” dep adlandırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
