Qırımtatar resurs merkeziniñ yolbaşçısı Eskander Bariyev Qırım.Aqiqatqa Rusiye apishanelerinde tutulğan Qırım siyasiy mabüslerine yapılğan basqı usulları aqqında tarif etti.
“Biz defalarca aytqanımız kibi, olar fizikiy basqı yapalar, işkence ete bileler, insanlarnı ŞİZO-ğa qoya bileler, amma bizge bir qaç vaqianı añlatqanlarında şaştıq, olar ruhiy basqı yapalar, yañlış telegrammalar ya da yaqınları ölgenini bildirgen mektüpler yazalar, ve bu aqta siyasiy mabüslerge aytalar, ya da psihotrop maddeler bereler”, — dep bildirdi Bariyev.
Onıñ aytqanına köre, Rusiye FSİN hadimleri psihotrop maddelerni, olarnıñ tesiri altında bulunğan insannı diger mabüsler ögünde masqaralıq obyekti olması içün qullanalar.
Bariyev Qırım mabüslerine, hususan olarnıñ şahsiy eşyalarını qullanıp, psihologik basqı yapılğanı aqqında da ikâye etti.
“Urbalarını qullana bileler ve insan tek içki kiyiminde ya da bunsız amamda yuvunğan soñ qala bile. Etapqa azırlan ve çantañnı azırla degende, çantanı kese bileelr, urbalar tüşe, olarnı toplamağa imkân bermeyler, ve şu insan ne alıp yetiştirse, onı ala. Yani, mında insanlarğa nisbeten ruhiy basqını köremiz", — dep qoştı Bariyev.
Bundan evel QRM, Rusiye akimiyeti siyasiy sebeplerden taqip etilgen 260 qırımlını apishanelerde tuta, dep bildirgen edi. Olardan 153 qırımtatardır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
