Oraq ayı 10 ve 11 künleri Romada olıp keçken Ukrayinanı ğayrıdan tiklev meseleleri dörtünci konferentsiyada (URC2025) Qırımğa bağışlanğan stend taqdim etildi, dep haber ete QMC-de Ukrayina prezidentiniñ Temsilciliginiñ matbuat hızmeti.
Müessisede bildirilgeni kibi, stendde Temsilcilik reintegrasiya siyasetini ve işğalden azat etilgen Qırımnıñ ğayrıdan tiklenüv strategiyasını taqdim ete, şu cümleden WE BUILD CRIMEA leyhasını.
“Stendde reintegrasiya siyasetiniñ ve Temsilcilikniñ işleriniñ esas aspektleri, em de işğalden soñ ğayrıdan tiklev strategiyası aydınlatıla. Qırımnıñ azat etilmesinden soñ onıñ ğayrıdan tiklenüvi ve inkişafı esnasında halqara destekniñ kerekligi qayd etile. Rusiye işğalcileri şimdi yoq etmege tırışqan regionnıñ turğun ğayrıdan tiklenmesiniñ ayırılmaz bir parçası olaraq medeniy mirasnıñ saqlanuvı ve ğayrıdan tiklenilmesine ayrı diqqat ayırıldı”, — dep aytıla haberde.
Müessisede bildirgenlerine köre, stendniñ maqsadı halqara toplulıqnıñ diqqatını işğal etilgen topraqlar mevzusını Ukrayinanıñ ğayrıdan tiklenüvi ve rekonstruktsiyası strategiyasına kirsetüv, Rusiye tarafından işğal etilgen Qırımda Ukrayinanıñ medeniy mirasını muntazam sürette yoq etüv ve saip etüv müimligine celp etmektir.
Standnı Ukrayina prezidentiniñ QMC-deki temsilciligi ve ZMINA insan aqları merkezi teşkil etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.