ABD, NATO ittifaqdaşlarını Ukrayinağa Patriot ava mudafaası sistemalarını bermege inandırmaq istey. Bu aqta ABD devlet kâtibi Marko Rubio bildirdi.
Onıñ aytqanına köre, Amerika Birleşken Devletleri Ukrayinağa bergen arbiy yardımnıñ büyük qısmı iç bir vaqıt toqtatılmadı, amma toqtatılmasınen bağlı olmağan daa büyük bir mesele bar, o, Ğarpnıñ, hususan Avropanıñ mudafaa istisal imkânlarına ait.
“Ukryinlerge kerek olğan şeylerden biri daa çoq Patriot. Patriot batareyaları Avropanıñ bir çoq memleketinde bar, amma kimse olarnı bermek istemey. Bunıñ içün bu deñişir, dep ümüt etem. Eger Ukrayina, Avropanıñ çoqusı memleketleri aytqanı kibi, kerçekten de birinci yerde tursa, olar şimdi ihtiyacları olmağan batareyalarnı bermege azır olmalı. Bunıñ içün, ümüt etem ki, biz NATO ortaqlarımızdan bazılarını Ukrayinağa bermege razı etermiz”, — dep ayttı Rubio.
Soñki aylar devamında, Rusiyeniñ Ukrayina şeerlerine ava ücümleriniñ faalleşkenini köz ögüne alıp, Kıyiv, ğarbiy ittifaqdaşlarına ava mudafaası sistemalarınıñ berilmesini arttırmaq ricasınen muracaat ete. Keçken afta Gaagadaki NATO sammitiniñ soñki matbuat konferentsiyası vaqtında prezident Donald Tramp, ABD Ukrayinağa qoşma Patriot sistemalarını satmağa qarar alacağını ilân etken edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.