Rusiye Mudafaa nazirligi, oraq ayınıñ 11-nde kündüz Qırımğa daa bir pilotsız üçaq ücüm etkenini bildirdi. Mütenasip haber, müessiseniñ içtimaiy ağlardaki saifelerinde derc etildi.
Qayd etilgenine köre, dronnı Rusiye ava mudafaası quvetleri urıp tüşürgen. Rusiye Mudafaa nazirliginde bu beyanatnıñ tafsilâtları ve tasdıqları berilmey.
Aynı zamanda “Krımskiy veter” telegram kanalı, Krasnoperekopsk rayonında eki patlav eşitilgenini yaza. Ne olğanını añlatmay.
Daa evel Rusiye Mudafaa nazirligi, oraq ayınıñ 11-ne keçken gecesi Qırım üzerinde 7 ukrayin dron urulıp tüşürildi, dep bildirgen edi.
2022 senesi arman ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı “Ukrayina uçucısızlarına” qarşı ateş ve “ava mudafaa sistemasınıñ işi” dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün “esas telüke” dep adlandırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.