ABD prezidenti Donald Tramp, vazifesine başlağan soñ ilk sefer, fevqulâde prezident vekâletlerini qullanıp, Ukrayinağa silâ berecek, dep yaza Reuters eki malümat menbasına atıf etip.
Söz prezidentke Kongressniñ razılığı olmadan qarar almağa imkân bergen Presidential Drawdown Authority yardım programması aqqındadır. Şimdilik Ukrayina Djo Baydenniñ memuriyeti vaqtında tasdıqlanğan yardımnı ala.
Agentlikniñ subetdeşleri, yañı arbiy yardım paketiniñ fiyatı 300 million dollarğa yaqın ola bile, dep iddia eteler, oña Patriot ava mudafaası kompleksleri içün raketalar ve orta mesafeli raketalar kirecek. Bunıñnen beraber, olarnıñ aytqanına köre, oña daa ne kirsetilecegi aqqında soñki qarar daa alınmadı.
Evel Tramp, Beyaz ev Ukrayinağa Patriot ava mudafaasınıñ kompleksini berüv imkânını baqqanını tasdıqlağan edi. Bundan evel “Axios”, ABD prezidenti Ukrayina prezidenti Volodımır Zelenskıyge Kıyivge Patriot ava mudafaası sistemaları içün 10 raketanı yollamağa vade etkenini yazğan edi.
Trump prezident vazifesine başlağan soñ, ABD Ukrayina mudafaasına yüz milliardlarnen dollar masraf etti ve cenkni toqtatmaq kerek, dep aytqan edi. Lâkin soñki vaqıtları ABD prezidenti Rusiyeden közü qaytqanı aqqında sıq-sıq ayta, Rusiye lideri Vladimir Putin ile soñki subetinden soñ Tramp Rusiye prezidentiniñ areketlerinden memnün olmağanını bildirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.