Ukrayina prezidenti Volodımır Zelenskıy oraq ayınıñ 10-nda saba bildirdi ki, Rusiye arbiyleri aman-aman 10 saat devam etken ücüm vaqtında 18 raketa, şu cümleden ballistik raketalarnı ve 400-ge yaqın dron qullanğan, olardan aman-aman 200-i Şahedler edi.
"Ücümniñ esas nişanları Kıyiv ve vilâyet edi, bundan ğayrı ücüm altında Çerniğiv, Sumı, Poltava, Kirovoğrad ve Harkiv vilâyetleri de edi. Yazıq ki, Kıyivde eki adam elâk oldı. Elâk olğanlarnıñ tuvğanları ve yaqınlarına taziyelerimni bildirem. Al-azırda 16 yaralanğan kişi aqqında belli", — dep qayd etti devlet yolbaşçısı ve bunı "Rusiye tarafından terrornıñ açıq-aydın arttırılması" dep adlandırdı.
“Bu, tezleştirüv kerek olğanını köstere. Sanktsiyalğa kelgende daa tez olmalımız ve Rusiyege basqı yapıp, terrorınıñ aqibetlerini is ettirmelimiz. Ortaqlar silâ ve tehnologiya inkişafına yatırım yapmaq içün daa tez areket etmeli. Bugün ortaqlarımıznen, hususan istegenler koalitsiyası çerçivesinde, Ukrayina içün yaqalama uçaqlarnıñ istisalı ve ava mudafaasınıñ teminlevi içün qoşma para berilmesi aqqında laf etecegim. Vazifeler tamamınen açıq. Rusiyeniñ böyle darbelerine sert cevap bermek kerek. Bu şekilde cevap berecekmiz", — dedi Volodımır Zelenskıy.
Rusiye oraq ayınıñ 10-na keçken gecesi Ukrayina regionlarına uçucısız uçaq ve raketalarnen ücüm etti. Hususan, Kıyivde eki elâk olğan ve 16 yaralanğan kişi aqqında belli.
Rusiye arbiyleri çeşit silâ qullanıp, Ukrayina regionlarına muntazam sürette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturasına, vatandaş ealisini öldürgenine, hastahaneler, mektepler, bala bağçaları, energetika ve suv teminlevi obyektlerini yoq etkenine red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri dep tanıy ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.